Nagpaandam ang House Committee on Suffrage and Electoral Reforms Chairman kag Lanao del Sur Representative Zia Alonto Adiong nga posible magdamo ang deepfakes, trolls kag fake news online samtang nagapadayon ang impeachment proceedings batok kay Vice President Sara Duterte sa Kamara.
Suno kay Adiong, ginalauman niya ang paglapta sang disinformation samtang nagalala ang interes sang publiko sa amo nga proseso.
Ginpangabay man sini ang publiko nga mangin kritikal kag maghalong sa mga impormasyon nga makita sa social media bangud kalabanan sini ang indi matuod.
Samtang, gin-umpisahan na sang House Committee on Justice ang paghinun-anon sa mga reklamo sa impeachment matapos napamatud-an nga sufficient in form kag sufficient in substance.
Nagpabutyag man sang katingala si Adiong nga 54 ka mga mamalidha ang nagboto bilang suporta sa impeachment batok sa bise presidente sa committee level, nga suno sa iya isa ka positibo nga patimaan nga mahimo malab-ot ang kinahanglanon nga numero sang boto.
Sa idalom sang proseso, kinahanglan ang suporta sang indi magnubo sa ikatlo nga bahin sang mga katapo sang Kamara agud mapadala ang reklamo sa impeachment sa Senado para sa hearing.
