Ginhingyo sang legal team ni former President Rodrigo Duterte sa International Criminal Court ukon ICC nga limitahan sa 10,000 items ang mga ebidensya nga pagagamiton sang prosecutor sa iya pagbista.
Amo ini ang ginpahayag sang defense counsel nga si Peter Haynes sa motion nga gin-file sang Septyembre 25 sa ICC Trial Chamber III.
Suno sa depensa, ang mga ebidensya nga mga butang nagtaas sa 62,130 gikan sa 5,275 sa hugnat sang kumpirmasyon.
Suno sa depensa, nagalakip ini sang masobra 320,000 ka pahina sang mga dokumento kag masobra 1,000 ka audio-visual materials, nga suno sa ila mabudlay nga repasuhon antes magsugod ang trial.
Ginkwestyon man sang defense team ang iban pa nga mga materyales bangud sa ginapahayag duplication sini, illegible files, sala nga impormasyon kag mga dokumento nga limitado ukon wala sang kaangtanan sa kaso.
Natalana nga magasugod ang trial kay Duterte sa ICC sa Nobyembre 30, 2026, samtang wala pa sang desisyon ang Trial Chamber III sa hingyo sang depensa.
