ROXAS CITY, CAPIZ- Gin-umpisahan na ang demolition sa mga puluy-an nga apektado sa pagpatindog sang bag-o nga slaughterhouse sa Sitio Puntod, Barangay Dinginan, Roxas City kahapon nga adlaw, Nobyember 28, 2025.
Sa interview sang Bombo Radyo kay Mr. Melvin Galagate, Information Officer III kag Head sang Roxas City Communicatons Group (RCCG), iya ginpahayag nga natigayon na nga nagguba ang anom sa walo tanan ka mga puluy-an nga nabilin.
Suno kay Galagate, kun madumduman, nagpatigayon sang consultative meeting ang City Management and Monitoring Unit sa pagpanguna ni Mayor Ronnie Dadivas kag ginpresentar ang lugar nga pagasayluhan sa Tanzaville sa Barangay Tanza, Roxas City.
Pahayag niya, may mga serye sang paghinun-anon nga natabo apang may yara gid sang nagpakatig-a.
Gin-athag ni Galagate nga ang nasambit nga lote nga pagatindugan iya sang City Government kag ang katuyuan sa pagpabalhin sang mga naga-istar amo ang pagpatukod sang bag-o kag malapad nga Double AA Standard Slaughterhouse.
Nahibaluan nga ang nasambit nga proyekto ang paga-pondohan sang Department of Agriculture pinaagi sa Philippine Rural Development Project nga nagabalor sang P76,305,000.00.
Interviewed by Bombo Sunnie Mae Constantino Batencila
