Nagpahanumdom ang Department of Health-Capiz sa publiko nga maghalong sa influenza-like illnesses.
Sa interview sang Bombo Radyo kay Jeoffrrey Espiritu, information officer sang Department of Health-Capiz, iya ginpahayag nga ang influenza ukon flu ang isa ka acute respiratory infection nga common sa mga tropical region kasubong sang pungsod Pilipinas.
Suno kay Espiritu, mahimo nga makarecover ang isa ka tawo nga ma-igo sang sini nga balatian kun mabaskog ang iya sini nga immune system.
Pahayag pa niya, likawan ang mag-ubo ukon pagbahing sa pampubliko nga lugar bangud posible ini nga makatapon sa pamaagi sang hangin kag magsuksok sang mask.
Nahibaluan nga may nabalhag na nga 27 ka kaso sang influenza-like illnesses sa bug-os nga probinsya sang Capiz, humalin Enero tubtob Setyembre subong nga tuig.
Dugang pa sang natungdan, kun nagalain na ang pamatyag, indi na maghulat nga maglala pa ini kag gilayon na nga magpadulong sa pinakamalapit nga health center ukon ospital agud mabulong ang mga ginabatyag.
