Ginpasalig sang pamunuan sang Department of Health nga preparado ang Pilipinas sa balatian nga Nipah virus bangud indi ini bag-o sa pungsod.
Suno kay DOH spokesperson Assistant Secretary Albert Domingo, ang una nga kaso sang virus ang na-record sang 2014 sa Sultan Kudarat kun sa diin 17 ka kaso ang na-record.
Gin-athag sang opisyal nga lakip sa mga sintomas sang virus amo ang trangkaso, brain swelling kag meningitis.
Mahimo man ini suno sa iya makuha pinaagi sa pagkaon sang karne sang kabayo kag pagpakig-upod sa mga indibidwal nga may yara sang Nipah virus.
Suno sa iya, humalin sang 2014, gina-monitor na sang Epidemiology Bureau ang nasambit nga virus kag wala pa sang narekord nga kaso sang amo nga balatian humalin sang 2014.
Ginpahayag sang World Health Organization nga ang NiV ang isa ka zoonotic virus nga mahimo makuha ukon mapasa paagi sa kontaminado nga pagkaon kag mga indibidwal.
Ginreport man sini nga pila ka bat species nga makita sa pungsod ang yara sa katalagman nga makaangkon sang amo nga virus.
Sa subong, padayon naman nga nagabantay ang DOH Bureau of Quarantine (BOQ) sa tanan nga airports kag pantalan, 24 ka oras, kon may balita man ukon wala sang Nipah virus.
