ROXAS CITY – Magasunod ang Department of Education (DepEd) Regional Office 6 sa desisyon sang National Inter-Agency Task Force nga pagbukas sang klase sa Agosto 24 sa pihak sang ginapangatubang sa karon nga coronavirus disease (COVID-19) pandemic.
Ini ang ginpahayag ni DepEd Regional Informational Officer Lea Belleza sang mainterview sang Bombo Radyo.
Suno kay Belleza nga sila ang magasunod sa nasambit nga mandu bangud ini ang naba-se man sa rekomendasyon sang gobyerno-nasyunal kag aprubado ni Presidente Rodrigo Duterte.
Ginpahayag sini nga ila gina-respeto ang pagpamalabag sang mga local chief executives apang suno diri madayon sa gihapon ang klase magluwas na lamang kun may mga pagbag-o sa igamandu sang national IATF.
Ginpahayag sini nga madamo sang ginahimo nga preparasyon ang ahensiya para sa pagbukas sang klase.
Kalakip na diri ang school readiness survey kun sa diin ila ginahibalo ang kadasigon sang internet sang mga estudyante sa ila lugar.
Ginatumod man kun sin-o lamang ang mahimo makakadto sa eskwelahan para sa ‘face to face’ nga klase.
Magapaidalom man sa paghanas ang mga manunudlo sumugod sa bulan sang Hunyo.
Para naman maamligan ang ikaayong-lawas sang mga estudyante, hugot sa gihapon nga ipatuman ang mga health protocols kapareho sang disinfection, physical distancing kag pagsuksok sang face mask.
Sa pihak sang ginapangatubang sa karon nga pandemiya, ginpahayag ni Belleza nga nakahanda ang DepEd Region 6 para sa pagbukas sang klase.
