ROXAS CITY – Wala sang may matabo nga face to face learning sa probinsya sang Capiz tubtob nga indi pa tapos ang COVID-19 Pandemic.
Ini ang ginpasalig ni Department of Education (DepEd) Capiz Schools Division Superintendent Dr. Salvador Ochavo, Jr. sang mainterview sang Bombo Radyo.
Suno kay Ochavo nga apisar nga may yara na sang mga kabanwahan sa probinsya nga wala na sang napagkit nga kaso sang amo nga balatian indi sa gihapon ini nagakadapat.
Ini bangud padayon sa gihapon nga nagadugang ang numero sang kaso sang amo nga balatian sa probinsya.
Magluwas diri, may pila man ka mga rason nga ginalantaw ang DepEd nga posible matabo sa tion nga magbalik na ang face to face learning kadungan sang ginapangatubang nga pandemya.
Ginpahayag ni Ochavo nga mahimo ini pa ang rason sang pagsaka liwat sang kaso sang amo nga virus bangud indi mabal-an kun sin-o ang carrier sang nasambit nga balatian.
Posible man nga maapektuhan ang mga modules nga ginagamit sa pagtulun-an sang mga manunudlo kun sa diin nasugoran naman sang mga estudyante.
Dugang pa ni Ochavo nga luyag lamang sini nga protektahan ang ikaayong lawas sang mga estudyante kag manunudlo batuk sa makamamatay nga virus.
Mas maayo na lamang suno diri nga hulaton na lang nga magbalik sa normal ang tanan antes ibalik ang face to face learning.
Samtang, ginpahayag man sini nga ang pagtudlo sang mga ginikanan sa ila mga kabataan ang makabig naman nga bonding sang pamilya sa isa ka isa.
