ROXAS CITY – Nangin matalunsay kag madinalag-on ang una nga semana sang implementasyon sang limited face-to-face classes sa mga buluthoan sa syudad sang Roxas.
Ini ang ginsiling ni Dr. Roel Bermejo, Superintendent sang DepEd Roxas City Schools Division sang ma-interview sang Bombo Radyo.
Suno diri, masobra na sa 36,000 ang mga enrollees sa mga buluthoan sa idalom sang Roxas City Division kag gina-ekspekar niya nga magadugang pa ini bangud padayon pa ang pag-encode kag may yara pa sang mga late enrollees.
Sa pihak sini, may yara sang buluthoan nga nabuhinan ang mga enrollees bangud nagsaylo sa mga private school ukon lain nga public school apang kalabanan sa mga buluthoan nagdugang ang mga estudyante rason nga ginakulang sang manunudlo.
Kaangut diri, magadugang ukon maga-hire sila sang local school board teachers ukon learning facilitators pinaagi sa bulig sang LGU sa syudad kun sa diin magabulig ini agud ma-address ang kinahanglanon sang mga buluthoan.
Ginkalipay man ni Bermejo bangud kalabanan sa mga estudyante ang independent na rason nga nagahagan-hagan man ang kadumuon sang tawo kun wala ang ginikanan, apang gin-athag sini nga kun luyag sang ginikanan nga tuytuyan ang ila kabataan sa pagpadulong sa buluthoan wala man ini sang problema.
Nagapasalamat ang doktor sa tanan nga sektor sang komunidad nga nagbulig agud mangin madinalag-on ang una nga semana sang f2f class.
Luyag sini ipalab-ot sa tanan, nga padayon nga suportahan kag magpartisipar kun ano man ang ila iga-implementar bangud para man ini sa kaayuhan ilabi na ang pagpatuman sang minimum health protocols.
Indi man suno diri pagkalimtan magpangamuyo sa mahal nga diyos nga mapalayo sa balatian ang mga estudyante.
