ROXAS CITY – Padayon ang preparasyon sang pila ka manunudlo sa idalom sang DepEd Roxas City Division para sa palaabuton nga limited face-to-face class sa Agosto 22.
Sa interview sang Bombo Radyo kay Dr. Roel Bermejo, Division Superintendent sang DepEd Roxas City Division, suno diri nagapadayon pa ang enrollment sa 50 ka mga bulutho-an sa elementary kag secondary nga naaprubahan sa implementasyon sang f2f classes.
Bangud diri, indi pa madeterminar sang mga aprubado nga bulutho-an kun ano ang mga kinahanglanon sang mga estudyante pati sang manunudlo kapareho sang kun pila ka mga classrooms ang pagagamiton bangud ginaba-se ini sa enrollment data.
Pahayag ni Dr. Bermejo, matawag ini sa gihapon nga blended learning bangud tungaon ang mga estudyante kun sa diin 50% diri ang magapatigayon sang klase sa bulutho-an, samtang ang katunga ang magapatigayon sang online class ukon modular sa ila puluy-an kag sa madason nga semana magabaylo naman ang mga estudyante sang set-up.
Dugang pa sang doktor nga iga-orient ang mga ginikanan kag magadihon ang tagsa ka bulutho-an sang “Basic Education Learning Continuity and Recovery Plan” antes mag-umpisa ang klase angut sa mangin set-up kag sa ila partikular nga sitwasyon.
Nagapasalamat naman si Dr. Bermejo sa tanan nga sektor nga nagsuporta kag nagbulig sa implementasyon kag preparasyon sang pagbukas klase.
