ROXAS CITY – Ginkumpirmar ni Department of the Interior and Local Government (DILG)-Capiz director nga ginpadal-an sini sang memorandum ang mga Local Government Units (LGU’s) nga wala pa makapapasar sang ila executive budget.
Ini matapos nga may direktiba nagikan sa opisina ni Sec. Eduardo Año nga nagapangayo sang report kun sin-o nga mga LGU’s ang nakasumiter na sang executive budget, ang wala pa kag ano ang estado sang ila pondo.
Ini ang nangin pahayag ni Mr. John Ace Azarcon, sang mainterview sang Bombo Radyo.
Bangud diri, ginpadal-an sini sang memorandum ang opisina sang gobernador nga naka-atensyon sa Sangguniang Panlalawigan kag nagkalain-lain nga LGU’s sa probinsya nga tubtob sa karon wala mapapasar ang ila executive budget.
Ginahatagan sang 15-diyas nga plaso ang mga natungdan nga maghatag sang ila justification sa estado sang amu nga pondo.
Nahibaluan nga may duha ka senaryo nga posible wala sang pondo ang isa ka LGU, una amu ang executive branch wala makapasar sang executive budget pakadto sa Sanggunian for action, ikaduha, nakapapasar ang executive apang wala maaprubahan ukon maaksyonan sang Sanggunian.
Klaro suno sa local government code, nga kun ang isyu ukon ang problema sa LGU ang gintunaan sa wala pagpapasar sang executive budget, ang kahimuan man sang executive side, posible nga magapanabat kriminal ukon administratibo nga kaso ang executive.
