ROXAS CITY- Yara na sa 96.39 porsyento nga natapos ang distribusyon sang Social Amelioration Program (SAP) sa bilog nga Western Visayas.
Ini ang ginpahayag ni Ms. May Rago Castillo-Regional Information Officer sang Department of Social Welfare and Development (DSWD) Region 6 sang mainterview sang Bombo Radyo.
Aminado si Castillo nga may yara sang iban nga mga Local Government Units nga indi maubos ang gin-alokar nga target households sang ahensya rason nga ginpakamaayo na lamang sang mga ini nga ibalik ang pondo sa DSWD.
Samtang yara na sa 98.77 porsyento nga natapos ang distribusyon sang (SAP) sang probinsiya sang Capiz kun sa diin duha na lamang ka mga LGU’s ang wala pa makatapos sa ila distribusyon.
Ang Roxas City nga yara na sa 99.97 porsyento ang distribusyon kag ang banwa sang Dumalag nga yara sa 75.44 porsyento ang distribusyon.
Samtang indi pa makompirmar ni Castillo kung may yara sang 2nd tranche ang SAP.
Suno kay Castillo nga ginahulat pa sang DSWD Region 6 ang guidelines gikan sa central office para sa 2nd tranche sang nasambit nga ayuda.
