ROXAS CITY, CAPIZ – Nagapanawagan ang Divorce Pilipinas Coalition sa publiko nga indi makulbaan sang pagbag-o nahanungod sa ginaduso nga mga hagna may kaangtanan sa absolute divorce sa 20th Congress.
Sang damlag lang, nag-file sang House Bill 108 si 4Ps Partylist Representative JC Abalos kag House Bill 210 nga gin-file naman ni ACT Teachers Partylist Representative Antonio Tinio kag Kabataan Partylist Representative Renee Louise Co nga may katuyuan nga liwat ipakilala ang absolute divorce sa Pilipinas.
Sa interview sang Bombo Radyo kay Alpa Joy Alfafara, Co-Founder kag Convenor sang Divorce Pilipinas Coalition, iya ginpahayag nga indi divorce ang problema sa Pilipinas sa baylo amo ang mga abusado sa relasyon.
Indi dapat magsiling ang tawo nga magadamo ang mabulaganay nga mag-asawa kun mangin layi ang divorce suno kay Alfafara bangud sala ini nga pagpati.
Sila sa organisasyon pahayag niya, wala niya gilayon gina-engganyo ang mag-asawa nga magbulagay sa baylo kun mahimo pa makaayo, mas luyag niya nga makaayo ini.
Nagapanindugan ang Divorce Pilipinas Coalition nga wala man ginapilit ang tawo sa diborsyo apang luyag nila nga may yara man sang patas nga layi sa pungsod.
Ginpaanggid man ni Alfafara ang diborsyo sa bulong nga kun wala ka man sang sakit, indi mo man ini kinahanglan.’
Apang base sa ila nga membership sa social media, ginabanta nga yara sa masobra 100,000 ka tawo ang pabor nga mangin layi ang divorce.
Dugang pa sang natungdan, indi man maapektuhan ang relihiyon sang tawo kun mangin layi ang diborsyo.
– Interviewed by: Bombo Lynd-C Bade
