ROXAS CITY – Nagapabilin nga daku nga palamangkutanon ang nadiskubrehan nga dugo sa kuko sang isa ka menor de-edad nga isa sa tatlo ka mga kabataan nga una nga nakasapo sa bangkay sang biktima nga si Jonathan Caloyloy sa Atila Balgos Avenue, Barangay Banica, Roxas City.
Sa interview sang Bombo Radyo kay alyas “Toto” nga nagapang-edaron sang 13 anyos, ginpanginwala sini ang mga alegasyon nga may kaangtanan ini sa kamatayon sang amo nga biktima.
Suno diri nga ang dugo nga nakita sa kuko sini ang tungod sa pagtandug sini sa iya punggod sa guya.
Matandaan nga ginpaidalom sa DNA Test ang dugo sang biktima kag sang menor de edad kag ginahulat nalang sa karon sang mga kapulisan ang resulta sini.
Samtang, ginkumpirmar naman sang VAWC Desk Officer sang Barangay Banica sining syudad nga may pila na ka mga rekord sang pagpangawat sa Barangay ang nasambit nga menor de edad.
Suno kay Anna Marie Albaladejo, masami nga ginadala sa Puloy-an sang Pagpalangga ukon Crisis Center ang menor de edad.
Aminado naman si Punong Barangay Victyor Dolor nga guba ang (3) ka mga streetligt sa ila lugar bangud samtang lima (5) lamang diri ang nagagana.
Ginpasalig man sang nasambit nga barangay nga igapaabot sini sa Sangguniang Panlungsod ang reklamo sa lugar nga ginluntaran sang pagbuno-patay sa biktima agud mapainan sang budget sa pagpahamtang sang dugang nga mga streetlights.
