Nagpahanumdom ang Department of Health (DOH) Capiz sa publiko sa pagkaon sang isda nga indi na preska, lakip na ang tulingan.
Ini kasunod man sang inisyal nga report nga nabaton nga walo ka miyembro sang isa ka pamilya ang naka-experiensya sang pagkalingin sang ulo matapos magkaon sang isda nga aloy ukon tulingan.
Sa interview sang Bombo Radyo kay Mr. Joeffry Espiritu, Public Information Officer sang Provincial DOH Capiz, iya ginpahayag nga ang amo nga klase sang food poisoning nagakatabo bangod sa indi husto nga pag-store sang isda, labi na gid sa mga mackerel nga isda pareho sang aloy kag tulingan.
Suno kay Espiritu, ang mga sintomas sang scombroid poisoning amo ang pagpalamula sang panit ukon pag-angkon sang pantal, pagpanimalhas, pagpalanakit sang ulo, sakit sang tiyan, pagpalanuka kag kabudlay sang pagginhawa.
Nagpanugyan man ini sa publiko nga siguruhon gid nga preska ang isda antes ini lutuon, indi dapat lub-ok kag wala sang malain nga baho.
