ROXAS CITY – Gindayaw ni Department of Justice (DOJ) Secretary Jesus Crispin ‘Boying’ Remulla ang talapatan sang National Bureau of Investigation (NBI) pag-abot sa pagpasangkad sang cyber security.
Sa ekslusibo nga interview sang Bombo Radyo Philippines sa tiglikom ginsiling sini daku ang nangin papel sang nasambit nga ahensya para sa pagtumod sa mga krimen nga nagakahinabo sa cyber world kag ‘very competent’ pag-abot sa ila trabaho.
Nagapati si Remulla, nga ang Cybercrime Office sang NBI ang isa sa pinakamaayo nga opisina sa bug-os nga pungsod.
Aminado man ini nga may yara pa sang kakulangan apang ginatinguhaan ini nga mahatag pinaagi sa pagpasangkad sang kampanya kag pag-improve sang serbisyo.
Suno kay Remulla, nagakinahanglan sang masobra 2,000 ka mga agents ang ahensya kag ginahulat na lang sini ang plantilla para sa paghired sang empleyado kag maangkon ang tinutuyo nga ‘bigger and bolder NBI’.
Sa pihak nga bahin, ginpakigbahin man sini ang maayo nga katuyuan sang Sim Registration Law kun sa diin target sini nga malikaw sa krimen ang mga cellphone users.
Ang cellular phone isa ka telecommunication device nga ginagamit sa mga krimen kaangay sang kidnapping, illegal gambling, Cybercime kag Child Pornography.
Pinaagi sa layi, gilayon nga matumod ang pagkakilanlan sang nagahimo sang krimen kag agud mangin hilway nga lugar ang Pilipinas nga tiniran.
