Nagpaguha sang pagsulundan ang Department of Labor and Employment (DOLE) para sa instakto nga pasweldo sa Pebrero 25 kung sa diin gindeklarar nga special working holiday.
Ini ang kadungan sa pagdumdum sa ika-39 nga anibersaryo sang makasaysayan nga EDSA People Power revolution.
Sa ginpirmahan nga labor advisory ni Labor Secretary Bienvenido Laguesma nakabutang nga kinahanglan ikonsiderar ang amu nga adlaw bilang “ordinary working day” para sa pagbayad sang sweldo kag wage-related benefits.
Kung ang isa ka empleyado, wala nagtrabaho sa nasambit nga petsa ipatuman ang ‘no work, no pay’ principle magluwas na lamang kung may yara sang paborable nga company policy, practice ukon collective bargaining agreement para sa paghatag sang bayad ukon sweldo sa special working day.
Para naman sa mga empleyado nga nagtrabaho sa special working day, kinahanglan nga bayaran sang employer ang 100% nga sweldo sang empleyado sa nasambit nga adlaw para sa una nga 8 ka oras.
Kung magsobra naman sa 8 oras, kinahanglan nga bayaran sang employer ang empleyado sang dugang nga 25% sang iya hourly rate.
