ROXAS CITY – Nangin madinalag-on ang ginhiwat nga Donning of Rank kag pag-inagurar sang 603rd nga napili bilang model battalion sa Camp Belo, Barangay Timpas, Panit-an, Capiz.
Tinutuyo sini nga kahiwatan amu nga marekognisar ang mga local Reservist sa probinsya nga amu ang magadugang bulig sa humanitarian activities, socio-economic response kag first responder sa tion sang kalamidad.
Ginkumpirmar man ni Lieutenant Colonel Mark Lester Cabunoc, director sang 603rd Capiz Community Defense Center nga kabahin sang seremonya amu ang pagrekognisar kay Governor Esteban Evan Contreras II nga Lieutenant Colonel (LTC) bilang Army Reservist.
Sa tion nga matapos ang election period, igapahamtang si LTC Esteban B. Contreras PA (RES) bilang Ready Reserve.
Nahibaluan nga may tatlo ka kategorya sa Reserve force, ini amu ang Ready Reserve (category 1), Stand-by Reserve (category 2) kag Retired Reserve (category 3).
Sa luyag mag-join sa Reserve Force, dapat ikaw ang naga-edad sang 18-anyos pataas kag physically fit.
Kun naka-gradwar sa basic ROTC, ginakonsiderar ang mga ini nga parte sang Reserve Force, apang sa wala makakuha sang basic ROTC, may programa ang PA nga Basic Citizen Military Training kada tuig agud makaangkon sang serial number kag kun college graduate kag may yara sang credentials, mahimo ini magamit agud mapataas ang rango nga luyag sang isa ka persona.
Mahimo man mag-file sang leave sa trabaho ang mga luyag mag-training sa Reserve Force, bangud protektado ini sang layi, dugang pa ni Cabunoc.
Ginklaro man sini nga wala sang bulanan nga sweldo ang pagiging Reservist, apang sa sulod sang 45 diyas, may yara sang allowances kalakip ang pagkaon sang mga aplikante.
