Ginhingyo ni Department of Public Works and Highways (DPWH) Sec. Vince Dizon ang Anti-Money Laundering Council nga i-freeze ang malapit P5 billion nga balor sang air assets nga ginapanag-iyahan ni Ako-Bicol Party-list Rep. Elizaldy Co kag sang mga kompaniya nga naangot sa mamalidha.
Una na nga ginpahayag ni Sec. Dizon nga ang Sunwest Inc. nga naangot kay Rep. Co amo ang yara sa likod sang lima sa pito ka mga substandard flood control projects sa Oriental Mindoro.
Gin-akusaran ang nasambit nga mamalidha sa pagpasulod sang binilyon ka pesos sa 2025 national budget nga nagpondo sang mga ginaalegar maanomaliya nga flood control kag iban pa nga infrastructure projects.
Ginapahayag nga yara sa Estados Unidos sang Amerika si Rep. Co agud magpabulong kag iya man nga ginpanginwala ang mga akusasyon batuk sa iya.
Sang damlag lang, ginkansela ni House Speaker Faustino Dy III ang travel authority ni Co kag ginmanduan ini nga magbalik sa Pilipinas.
Samtang, naghingyo man ang Department of Public Works and Highways sang freeze order sa Anti-Money Laundering Council para sa malapit P500 million nga balor sang mga salakyan nga rehistrado sa idalom sang pila ka mga opisyal sang ahensya kag contractors nga aangot sa flood control corruption scandal.
Ginpahayag ni Sec. Dizon nga nag-issue na sang show cause orders ang DPWH batuk sa pila ka mga regional directors kag district engineers nga ginaalegar involved sa ghost ukon substandard flood control projects amo man sa garbuso nga pagpangabuhi.
