Driver nga nagpamalibad kag nagdiskriminar sang pasahero, ginapabayad sang penalidad

ROXAS CITY – Nagdangat sa P1,000 ang ginapabayad nga penalidad sa driver nga nagdiskriminar kag nagpamalibad pasakyon ang pasahero sa may bahin sang San Lorenzo Ruiz Subdivision.

Matandaan nga nagviral sa social media ang post ni ‘Sharon’ kun sa diin wala ini ginpasakay sang tricycle driver bangud ginapahayag sa kadakuon sini sang lawas.

Sa pakig-angut sang Bombo Radyo kay Mr. Gonzalo Andrada Jr, pinuno sang Traffic Management Unit (TMU) suno diri, gin-isyuhanan na sang tiket ang driver bangud sa pagpamalibad nga magpasakay sang pasahero ukon refusal to convey passenger kag ‘discourteous’.

Suno diri, ginpanginwala sang driver ang akusasyon nga ginbalibaran sini kag gin-insulto ang tagreklamo kag nagpirma na lang nga magabayad na lang ini sang penalidad.

Samtang, liwat nga ginapahanumduman ni Andrada ang mga traysikol driver nga likawan ang pagpili sang pasahero, ilabi na ang ‘body shaming’ bangud nakasaad sa ordinansa nga ang mapatud-an nga nagadiskrimar sang pasahero magapangatubang sang nagakaigo nga penalidad.