ROXAS CITY – Dead on arrival sa Bailan District Hospital ang driver sang motorsiklo, matapos nga bumunggo ini sa kasugata nga salakyan, sa Sitio Gabok, Brgy. Conciencia, Panitan, Capiz, pasado alas-9 kagab-i sang Domingo, Pebrero 12.
Ginkilala ang napatay kay Regie Deciembre Dorado 21-anyos, construction worker, driver sang Rusi nga motorsiklo kag residente sang Brgy. Tincupon, sa amu nga banwa.
Sandig sa nakuha nga impormasyon sang Bombo Radyo sa inisyal nga imbestigasyon sang Panitan Municipal Police Station, nagaguwa nag samtang ginasubay sang driver sang Nissan Frontier nga si Rey Descalzota Delfin, 58-anyos, ang nasambit nga dalan nagikan sa ila barangay sa Indayagan, Maayon, Capiz padulong sa syudad sang Roxas, sang hinali nga bumunggo ang kasugata nga motorsiklo sa iya nga salakyan.
Bangud sa impact, nagtabog ang driver sang motorsiklo kag nag-angkon sang patal nga pilas sa lawas.
Nagaguwa sa imbestigasyon sang mga kapulisan nga samtang nagamaneho sang motorsiklo si Dorado, nagikan sa trabaho kag papuli sa ila puloy-an kaupod sanday Arnel Aletre Bolante, Donald Deciembre Icayan kag Roland Dollete Aletre, sakay ila tagsa-tagsa nga mga motorsiklo, sang nag-overtake si Dorado sa isa pa ka motorsiklo kag dumiretso sa salakyan ni Delfin.
Ginpadangat pa si Dorado sa Bailan District Hospital aapang wala ini makaluwas sa kamatayon.
Ginpakamaayo man sang driver sang nabungguan nga salakyan nga magboluntaryo sungka sa mga kapulisan.
Nagapadayon ang imbestigasyon angut sa insidente.
