ROXAS CITY – Gindeklarar nga dead on arrival sa isa ka pribado nga ospital sa syudad sang Roxas ang driver sang motorsiklo, matapos makabunggo sang magpamilya, sa dalanon nga sakup sang Barangay Anhawon, banwa sang Panay, alas-9:00 kagab-i, Mayo 13.
Ginkilala ang driver kay Ryan Edem, 33-anyos, driver sang Honda CBF 110, nagaduag itom nga motorsiklo, security guard kag residente sang Brgy. Yatingan, Pontevedra, Capiz.
Samtang, ginkilala ang maghimata nga nabungguan nga sanday Vilma Dequello, 52-anyos kag mga kabataan sini nga sanday Erlyn Dequello, 34-anyos, Erneta Dequello, 33-anyos, kag 17-anyos nga babayi.
Sandig sa inisyal nga imbestigasyon sang mga katapo sang Panay MPS, nga samtang nagapangita sang kadena sang ila traysikol ang nasambit nga magpamilya, sa kilid sang karsada padulong sa direksyon sang Pontevedra, hinali nalang sila nabungguan sang nagapadulong nga motorsiklo nga ginamaneho sang nasambit nga security guard, sakay ang bata sini nga 5-ka tuig nga lalaki, nga yara napuwesto sa iya unahan.
Bangud sa impact sang pagkabunggo, nag-angkon sang kapilasan sa lawas ang mga maghimata nga gilayon ginpadangat sang mga katapo sang Panay Emergency Rescue Team sa RMPH.
Samtang ang driver sang motorsiklo kag ang iya bata ang nagtabog sa ila motor, nga ginpadangat sa The Health Centrum Hospital sa Barangay Banica, sini nga syudad, apang wala makasalbar ang amu nga amay.
Nagapabilin man nga ginabulong ang nasambit nga bata sa ospital.
Nahibaluan nga wala sang headlight ang motorsiklo sang security guard.
Nagapadayon ang imbestigasyon sang mga kapulisan angut sa insidente.
