ROXAS CITY- Arestado ang isa ka 35-anyos nga driver sang truck matapos ang ginapatigayon nga drug buybust operation sang mga katapo sang kapulisan sa Brgy. Consolacion, Dumalag Capiz
Ginkilala ang suspek kay Roderick Fran, residente sang Brgy. Dolores sa nasambit man nga banwa.
Sa interview sang Bombo Radyo kay PMaj. Cherryl Visto, Hepe sang Dumalag MPS, ginpahayag sini nga nagdugay sang kapin duha ka bulan ang ila nangin monitoring sa suspek antes natigayon ang nasambit nga operasyon.
Dugang pa ni Visto, isa man ka drug surenderee ang nasambit nga suspek sa ila banwa kag nalakip man sa listahan sang BADAC sa ila barangay.
Nakuha naman sa paghinakop sng suspek ang 16 tanan ka sachet sang ginaalegar shabu kung sa diin isa ang nabakal diri sang mga kapulisan sa baylo sang P5,100 nga buybust money.
Ginabulubanta nga yara sa 75 gramos ang kabug-aton sng mga nakumpiskar nga ilegal nga droga nga may standard drug price nga masobra sa P500,000.
Sa karon, nakahunong na sa karsel sang Dumalag PNP si Fran kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
