ROXAS CITY, CAPIZ- Arestado ang apat ka mga indibidwal matapos ang ginpatigayon nga drug-buybust operation sang Philippine Drug Enforcement Agency (PDEA) Capiz sa isa ka drug den sa Sitio Railway, Barangay Punta Tabuc, Roxas City.
Ang nagkaladakpan amo sanday Josemar Adremesin, 32-anyos, subject person kag residente sang Barangay IX, Roxas City, Roel Martizano, 24-anyos sang Barangay Punta Tabuc, Roxas City, Seraphin Naig, 37-anyos sang Barangay Tiza, Roxas City, kag Camille Duron, 38-anyos sang Barangay Baybay, Roxas City.
Sa interview sang Bombo Radyo kay Intelligence Officer III Jose Ramir Batuigas, Provincial Officer sang Philippine Drug Enforcement Agency (PDEA) Capiz, iya ginpahayag nga pamaagi sa isa ka pulis nga nagpakuno-kuno poseur-buyer natigayon nga magkaladakpan ang amo nga mga persona.
Suno kay Batuigas, may yara sang duha ka mga indibidwal ang nakapalagyo sa amo nga operasyon apang ginsigurado sini nga indi nila pagluatan ang amo nga mga persona nga madakpan.
Pahayag nya, sang tion sang operasyon, dakop sa akto ang mga nagkaladakpan nga nagagamit pa sang iligal nga droga.
Nakuha sa paghinakop sang mga ini ang 18 tanan ka sachets sang ginpatihan shabu nga may kabug-aton nga 25 gramos kag ginabulubanta nagabalor P225,000, P500 buybust money, isa ka coin purse nga nagaduag sang gray, duha ka multi-colored lighter purse, isa ka unit sang cellphone, isa ka lighter, syam ka aluminium foil strips, kag duha ka bilog sang improvised tooter.
Kaso sa paglapas sa Republic Act 9165 ukon ‘Comprehensive Dangerous Drugs Act of 2002’ ang ginapangatubang sang mga arestado.
Sa subong, nagapabilin ang mga ini sa kustodiya sang Roxas City Component Police Station para sa nagakaigo nga disposisyon.
Interviewed by Bombo Sunnie Mae Batencila
