ROXAS CITY – Nakapalagyo ang subject sa ginkasa nga drug buybust operation sang Station Drug Enforcement Team (SDET) sang Roxas City Police Station kag Philippine Drug Enforcement Agency (PDEA) sa Sitio Nipa Barangay Culasi, Roxas City.
Ginkilala ang subject sa kay Necanor Macalintal, 46-anyos residente sang amo nga lugar.
Suno kay Police Master Sergeant Ramil Arcangeles nga namutikan ni Macalintal ang operasyon sang mga kapulisan rason nga nakapalagyo ini.
Apang narekober sa isa ka balay nga nagaserbe “drug-den” ang duha ka mga plastic sachets nga ginpatihan shabu, P1,000 nga buybust money, P14,000 nga boodle money, isa ka unit sang cellphone kag mga drug paraphernalia.
Kalakip sa mga na-aresto ang 5 ka mga persona kalakip na ang asawa kag duha ka mga kabataan ni Macalintal nga ginaalegar nagapatigayon sang pot session.
Gindugang pa ni Arcangeles nga drug surrenderer si Macalintal nga madugay na nga ginamonitor sang mga kapulisan.
Samtang gin-aku sang anak ni Macalintal nga madugay na nga imbolbado sa ilegal nga droga ang amay.
Suno sa anak ni Macalintal nga makapila na kabeses sini nga ginsaway si Macalintal apang wala ini nagapati sa ila.
Samtang, ginpanginwala naman sini nga nagapatigayon ang mga suspek sang pot session sa ginpatigayon nga operasyon sang mga kapulisan.
