ROXAS CITY – Nagapreparar na ang Department of Social Welfare and Development (DSWD) Extension Office-Capiz sa pagsugod sang hinatagay sang educational assistance sa mga indigent nga mga estudyante sa probinsya sumugod buwas nga adlaw, Agosto 20.
Sa interview sang Bombo Radyo kay Mrs. Josephine Degala, team leader sang SWAD Capiz, iya ginsiling nga kapin 1,200 nga mga benepisiaryo ang ila target nga mahatagan buwas kun kumpleto ang ipakita nga mga rekisitos kun sa diin 400 ang nagikan sa elementary, 300 sa high school, 300 sa senior high school, kag 200 naman sa college.
“First come, First Serve” naman suno diri ang ila pagasundon kag pagahiwaton ini sa Capiz Villareal Stadium kada Sabado sumugod buwas Agosto 20, 27 kag Setyembre 3, 10, 17 kag 24.
Dapat man suno diri nga yara ang ginikanan sa pagkuha sang educational assistance dala ang valid ID kag registration form sang estudyante nga makapamatuod nga nakapa-enroll ini, maga-agi man sa assessment sang DSWD ang mga makuha agud mapamatud-an nga indigent ukon imol ang mga luyag makabaton.
