Nagapanawagan naman ang Department of Social Welfare and Development ukon DSWD nga magdugang pa gid sang mga volunteers agud magbulig sa pagpreparar sang family food packs (FFPs) para sa mga pamilya nga apektado sang paglupok sang bulkan Kanlaon.
Suno sa DSWD-National Resource and Logistics Management Bureau (NRLMB), ang mga volunteers mahimo makakadto sa National Resource Operations Center (NROC) sa Chapel Road, Brgy. 195 syudad sang Pasay.
Ginalauman nga magabulig ang mga volunteers sa pagpreparar sang madamo nga FFPs nga ginalauman nga ipadala sa mga apektado sang paglupok sang bulkan, lakip na ang mga ulihi nga gin-evacuate kahapon (Abril 8).
Kahapon, may isa naman ka explosive eruption sa bulkan nga naglawig sang ginabanta isa ka oras.
Una na nga ginpahayag ni DSWD Secretary Rex Gatchalian nga may masobra 250,000 ka mga FFP nga naka-preposition sa mga bodega sang ahensya sa Western Visayas kag Central Visayas, antes pa man ang panibag-o nga paglupok.
Humalin sang ulihi nga paglupok sang bulkan sang Disyembre 2024, wala untat ang pagpadala sang bulk FFPs sang DSWD sa mga residente nga gin-evacuate kag temporaryo nga nagapuyo sa mga evacuation centers.
Magluwas sa masobra 250,000 ka mga FFPs sa duha ka rehiyon sang Western kag Central Visayas, may yara man sang 100,000 ka mga FFPs nga natago sa mga bodega sang ahensya sa Negros Island Region.
Ang dugang nga 2.5 milyones ka FFPs ang gina-preposition man sa iban nga mga bodega sang ahensya sa nagkalain-lain nga bahin sang pungsod.
