Ginpatpat sang Department of Social Welfare and Development (DSWD) Regional Office VI ang mga guidelines ukon basehan sa pagdeterminar kun sin-o ang mga kwalipikado nga makabaton sang Emergency Cash Transfer (ECT) para sa mga naapektuhan sang pagbaha tuga sang Bagyo Ramil sa probinsya sang Capiz.
Ang ECT program amo ang isa ka pamaagi sang DSWD para makahatag sang financial assistance sa mga pamilya nga naapektuhan sang kalamidad.
Suno sa DSWD Regional Office 6, may yara sang duha ka kategorya sang benepisyaryo.
Ang totally affected amo ang makabaton sang ₱10,000 kung totally damaged ang balay, indi na maistaran, may long-term displacement, may dako nga kapierdihan sa pangabuy-anan nga lapaw sa 50%, ukon may napatay nga miyembro sang pamilya.
Samtang, ang mga partially affected ang makabaton sang ₱5,000 kung partially damaged ang balay, temporaryo lang nga nadisplaced ukon indi maglapaw 3 ka adlaw sa evacuation center, ukon may gamay nga kapierdihan sa pangabuy-anan nga mas manubo sa 50% kag may nasamaran ukon nagmasakit nga miyembro sang pamilya.
Ginklaro man sang talatapan nga indi kinahanglan magpresentar sang video ukon picture sang baha bilang ebidensya, bangud ang barangay officials mismo ang magapat-ud kun ano ang lebel sang halit sa ila lugar.
Gina-obligar man sang DSWD ang mga barangay councils nga magpatigayon sang community assembly upod ang City/Municipal Action Team kag CSWDO para ipa-abot sa tanan nga pumuluyo,naapektuhan man ukon wala ang mga guidelines kag proseso sang pagvalidate antes ang paghatag sang ayuda.
Dugang pa sang natungdan, kun may yara sang mga pamangkutanon ang magdiretso sa barangay kag likawan ang magpost sa social media.
