Nangin madinalag-on ang tuigan nga Dugong Bombo 2024 nga ginpatigayon sa 22 Key Cities Nationwide, kon sa diin, nalab-ot ang inisyatibo nga ginapaabot paagi sa pagtipon sang mga donasyon sang dugo gikan sa 4,451 ka maalwan nga mga donor.
Nakatipon sang 2,002,950 cc, katumbas sa 2,002,950 ka litro ukon 529.12 ka galon sang dugo. Ini nga kadamuon ang halos katumbas man sang 10 ka drum sang dugo.
Samtang ang kahiwatan orihinal nga ginplano para sa 24 ka key cities, ang campaigns sa Naga kag Legazpi City ang kinahanglan nga ipaiway bangud sang bagyo kag gin-reschedule sa Nobyembre 23, 2024.
Ang inisyatibo ang gin-organisar kaupod ang Bombo Radyo Philippines Foundation Inc. kag ang Philippine Red Cross, sa suporta sang mga lokal kag national nga mga sponsors, subong man ang wala nagabag-o nga suporta sang mga tagpalamati kag mga volunteers sa bug-os nga pungsod.
Ginabig naman sang Bombo Radyo Philippines nga isa ka kadalag-an sa linibo ka mga nagdonar sang dugo bangud ang ila walay-sapayan nga kontribusyon, padayon nga nagaluwas sang kabuhi.
Ang ila pagkamaalwan nagapat-od nga ang mga ospital kag healthcare facilities sa bug-os nga pungsod makasabat sa nagadamo nga deman sang life-saving blood.
Ginpahayag nga ang Dugong Bombo 2024, ang isa ka halimbawa sang kolektibo nga baganihan, nga nagapakita kon paano ang mga komunidad sa bug-os nga Pilipinas nagatingob sa pagpabakod sang blood reserves, pagpasanyog sang paghiliusa, kag pagpalapnag sang kaluoy kag paglaum.
Nahibaluan nga tayuyon nga ginakilala sang Philippine Red Cross ang Bombo Radyo Philippines bilang nagapanguna nga organisasyon sa pungsod sa pagkuha sang pinakamadamo nga blood units sa bug-os nga pungsod sa isa lamang ka adlaw.
