ROXAS CITY – Madugay na nga ginatiktikan sang mga kapulisan ang duha ka mag-ulutod, matapos ang ginkasa nga drug buy bust operation sa Brgy. Ongol-Ilaya, Dumarao, Capiz.
Matandaan nga ang mga nagkaldakpan ang nagapang-edaron sang 28-anyos kag 32-anyos nga lunsay residente sang Barangay Astorga, sa nasambit nga banwa.
Sa interview sang Bombo Radyo kay Plt. Irene P. Toos Deputy COP Dumarao Municipal Police Station, ginapahayag sini nga ang nasambit nga mga persona ang ginakabig street level individual (SLI) sa ila barangay.
Natigayon nga madakpan ang mga suspek pinaagi sa nagpakuno-kuno nga police poseur buyer kung sa diin may standard drug price P1,100 kag may kabug-aton nga 0.5 gramos kag P100 nga buy bust money.
Suno kay Toos, natigayon ang mga ini nga madakpan pinaagi sa gintingob nga puwersa sang Dumarao MPS, Capiz-PPDEU, Cuartero MPS kag Dao MPS.
Sa karon, nagapabilin sa kustodiya sang Dumarao Municipal Police Station ang mga suspek para nagakaigo nga disposisyon.
