ROXAS CITY – Lunsay gindeklarar nga dead on arrival sa magkatuhay nga ospital sa probinsya, ang duha ka mga driver sang motorsiklo matapos nga nagbungguanay sa national highway sang Barangay Nasunogan, Dao, Capiz, alas-9:50 kagab-i sang Sabado.
Ginkilala ang mga napatay kay Jonel Dormido Celiz, 30-anyos, driver sang Suzuki radier nga motorsiklo kag residente sang Barangay Nagba, Cuartero, Capiz kag Nonito Oseta Flores Jr., 28-anyos, driver sang Honda TMX 155 nga motorsiklo kay residente sang Barangay Atiplo, Mambusao, Capiz.
Sandig sa imbestigasyon sang mga katapo sang Dao MPS, nga samtang ginamaneho ni Celiz ang iya motorsiklo nagikan sa Mambusao papuli sa Barangay Nagba, Cuartero, sang nabungguan ini sang kasugata nga motorsiklo nga ginamaneho ni Flores.
Ginapahayag nga head on collision ang nagluntad nga pagbungguanay sang duha, nga gintunaan sang ila gulpi nga kamatayon.
Ginpadangat pa sa Mambusao District Hospital ang driver sang raider, samtang sa Dao District Hospital ang driver sang TMX, apang lunsay ang mga ini ginbawian sang kabuhi.
Wala man nasambit sa imbestigasyon sang mga kapulisan kun madasig ang ila pagmaneho sang motorsiklo, ukon madulom ukon masanag ang lugar sang insidente.
Nagapadayon ang imbestigasyon sa nasambit nga insidente.
