Roxas City – Arestado ang duha ka mga drug personality sa ginkasa nga drug buybust operation sang mga katapo sang Station Drug Enforcement Team sang Roxas City PNP sa Barangay Lawaan, Roxas City.
Ginkilala ang mga arestado nga sanday James Michael Facto 39-anyos sang Barangay Bolo kag Mark Anthony Candig 34-anyos sang Barangay Adlawan sining siyudad.
Suno kay Police Master Sergeant Ramil Arcangeles, tagpamaba sang Roxas City PNP nga natigayon ang transaksyon sa duha ka drug suspek pinaagi sa cellphone kun sa diin ang mayor nga subject diri amo si Facto nga nahilway sadto pinaagi sa plea bargaining agreement.
Narekober naman sa posisyon sang mga suspek ang 4 ka sachets sang ginapatihan shabu nga may market value nga P20,000, 500 pesos nga buybust money kag cellphone.
Nakahunong na karon sa karsel sang Roxas City PNP ang mga arestado.
Natalana naman nga pasakaan ang mga arestado sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
