MAMBUSAO CAPIZ – Pilason ang duwa ka mga persona, matapos ang nagluntad nga insidente sa tunga sang motorsiklo kag Fuel Tanker sa Sitio Ilo Barangay Poblacion,Proper, Mambusao, Capiz.
Ginkilala ang driver sang motorsiklo kay Alyas “nonoy”20-anyos, kag ang backrider sini nga ginkilala kay Alyas “Nene”; 19-anyos kag lunsay mga residente sang Brgy.Lonoy, Sapian Capiz.
Samtang nagpalagyo ang wala pa makilan-an nga driver sang amo nga tanker sa wala matumod nga direksyon matapos ang insidente.
Suno sa inisyal nga impormasyon nga nakuha sang Bombo Radyo Roxas nagikan kay PCAPT. DENNIS LOSBAÑES,Hepe sang MAMBUSAO MPS, ginpahayag sini nga samtang ginasubay sang driver sang motorsiklo ang dalan sang nasambit nga barangay padulong sa iya puluy-an sa banwa sang Sapian.
Suno kay Losbañes nagwakli ang pangulihi nga porsyon sang Fuel Tanker pakadto sa pihak nga linya sa dalan kung sa diin ang motorsiklo rason nga iya ini nalab-ot kag aksidente nga nabungguan.
Dugang pa sini, nadulaan sang kontrol sa pagmaneho ang driver sang Fuel Tanker bangud sa tuman kadanlog sang amo nga karsada rason nga bumunggo ini sa kasugata nga motorsiklo.
Bangud sini, nag-angkon naman sang kahalitan ang mga imbolbado nga behikulo bangud sa natabo nga aksidente kag nag angkon sang pilas sa magkatuhay nga lawas ang driver sang motorsiklo kag ang backrider sini.
Gilayon naman nga ginpadangat ang mga biktima sa Mambusao District Hospital para madapatan sang nagakaigo nga pagbulong.
Sa karon, nagapatigayon na sang hot pursuit operation sang Mambusao PNP kag nagapadayon pa ang maid-id nga imbestigasyon sang mga ini angut sa nasambit nga insidente.
