Ginkuwestyon sang zero-waste advocacy group nga EcoWaste coalition ang wala pagpatuman sang littering ban sa kasagsagan sang Traslacion 2025.
Ini ang kasunod sang ginapahayag “out-of-control littering” nga natabo sa tunga sang tuigan nga selebrasyon sang kapiyestahan sang Hesus Nazareno.
Sa isa ka statement, ginpahayag sang grupo nga nabilin ang indi kinaandan nga tambak sang basura sa tunga sang selebrasyon nga nagtuga sang exhaustion ukon kakapoy sang mga volunteer kag waste worker.
Suno kay zero waste campaigner Ochie Tolentino, apisar nagpatuman ang mga otoridad sang istrikto nga gun kag liquor ban agud masiguro ang kalinungan, ginkatingala sang grupo kun ngaa wala ginbawal ang paglapta sang basura nga isa suno diri nga environmental offense nga ginadumili sa national kag local laws.
Masubo suno diri lantawon ang indi istrikto nga pagbawal sa paglapta sang mga basura sa isa ka religious event sa tunga sang pag-obserbar sang Zero Waste Month subong nga Enero kag ika-25 nga anibersaryo sang Ecological Solid Waste Management Act.
Suno sa koalisyon, pila sa nahakot nga mga basura amu ang sleeping materials, food-waste, mga botelya nga may unod pa nga ihi, soiled diapers, plastics, mga upos sang sigarilyo kag vapes.
Pahayag pa sang grupo, wala ginpulot sang mga participant sang Pahalik, Fiesta Misa Mayor kag tubtob kaagahon nga vigil sa Quirino Grandstand kag Parade ground ang ila nga mga basura subong man sa mga karsada sa Quiapo.
Kaangut sini, nag-apelar ang grupo sa mga deboto para sa mas malimpyo, mas sustainable nga selebrasyon nga santo sa diwa sang paghatag bili sa pagtuo kag sa aton ginaistaran nga planeta.
