Empleyado sang isa ka resort naaksidente matapos ginlikawan ang nagalagsanay nga mga ido sa karsada

ROXAS CITY – Pilason nga ginpadangat sa ospital ang empleyado sang Sa Antonio resort sa Barangay  Baybay matapos naaksidente sa dalanon ang ginamaneho nga motorsiklo sa Arnaldo Boulevard, sining syudad.

Ginkilala ang biktima nga si Ricky Aporta sang Barangay Lonoy, Roxas City nga nag-angkon sang pilas sa siko kag iban nga parte sang lawas.

Ba-se sa pahayag ni Ana Gloria, isa sa una nga nagresponde sa biktima nga padulong sa ginatrabahuan nga resort si Aporta sang nagpatunga sa karsada ang duha ka nagalagsanay nga mga ido.

Ginlikawan sang biktima ang nasambit nga mga sapat apang wala sini makontrol ang motorsiklo kag natumba.

Gilayon naman nga gindala sa ospital si Aporta agud madapatan sang nagakaigo nga pagbulong ang naangkon nga samad.