ROXAS CITY – Ginpamatbatan sang korte nga guilty sa kaso nga Theft ukon pagpangawat ang isa sa mga empleyado sang Public Attorney’s Office (PAO) sa siyudad sang Roxas.
Sa anum ka panid nga desisyon nga ginpapanaog ni Bonifacia Carmen Chuchi Ramos, presiding judge sang Branch 3 Municipal Trial Court in Cities, guilty beyond reasonable doubt ang nangin pamatbat sini batuk sa akusado nga si Emmanuel Gonzales, administrative assistant sang PAO sa kaso sini nga Theft.
Gin sentensyahan man ini sang pagkabilanggo nga magalab-ot sa duha ka bulan ukon Arresto Mayor.
Matandaan nga gin-akusaran si Gonzales sang pagkawat sang clutch handle sang isa ka Suzuki raider nga motorsiklo nga yara sa idalum sang kustodiya sang City Prosecutor’s Office kag naka park sa sulod sang Roxas City Hall of Justice sang tinalikdan nga Mayo 24, 2018 kun sa diin nakit-an ini sang mga security guards sa amo nga talatapan nga ginakuha sini ang amo nga bahin sang motorsiklo.
Sa pagrekisa kay Gonzales sang duha ka mga guwardiya, nakuha sa iya nga posisyon ang amo nga clutch handle.
Depensa naman sang nasambit nga empleyado, samtang nagalakat ini sa lobby sang hall of justice matapos magpaninlo sa talatapan sang PAO, nakapudyot ini sang mga basura kalakip na ang clutch handle sang motorsiklo.
Wala na sini madiparahan sa paghaboy sang mga basura nga nasulod sini sa iya nga bulsa ang nasambit nga butang.
Samtang wala naman ginpatihan sang korte ang depensa ni Gonzales rasun nga ginpamatbatan ini nga mabilanggo sang tubtob duha ka bulan.
Mahibaluan nga gin promulgar sang korte ang desisyon sini sang tinalikdan nga adlaw.
