ROXAS CITY – Patay na sang nasapwan ang 23-anyos nga engineer, takna alas 7:13 kaina sang aga sa Zarraga, Iloilo.
Ginkilala ang biktima kay Engr. John Paul Tecson residente sang Brgy. Lacaron banwa sang Dao, Capiz kag temporaryo nga nagatiner sa Happy Homes Subd., Poblacion Ilaya, Zarraga.
Sa pagpakig-angut sang Bombo Radyo kay PMsg. Jeffrey Sirue sang Zarraga Municipal Police Station, nga natingala na lang ang mga kaupdanan sang biktima nga wala pa ini nakaguwa sa iya kwarto.
Bangud diri, ginsulod nila ang kwarto ni sang biktima kag nakit-an nga nagahapa ini sa iya ginahigdaan nga double deck kag wala na nagaginhawa.
Madasig nga gindala sa ospital si Tecson apang gindeklarar nga dead-on-arrival kag suno kay Dr. Rupas Tupas, nakuryente ini nga gintunaan sang iya kamatayon.
Sa imbestigasyon sang Zarraga Police, may nakita sila nga charger nga nakasaksak kag yara sa hiligdaan ni Tecson nga posible gintunaan sang iya pagkakuryente.
Sa karun, ginahulat nalang ang desisyon sang pamilya sang biktima kun ini ang igapaidalom sa autopsy.
