ROXAS CITY-Ginkompirmar sang tagpamaba sang 3rd Infantry Division sang Philippine Army ang natabo nga pagpangharas sang ginapatihan mga katapo sang New People’s Army sa mga militar sa Barangay Roosevelt, Tapaz, Capiz.
Sa interview sang Bombo Radyo kay Major Cenon Pancito III ginpahayag sini nga gin-harass kag ginpalukpan sang mga katapo sang rebelde ang mga katapo sang militar nga nagapatigayon sang Community Support Program sa nasambit nga barangay.
Suno kay Pancito nga ginabulubanta 15 ka mga ginapatihan katapo sang NPA nga gintumod sini nga grupo sang Mt.Caloy Front ang nagpaulan sang bala sa mga katapo sang militar.
Wala man sang napatay kag napilasan sa hanay sang militar sa nasambit nga engkwentro.
Mahibaluan nga narekober sa lugar ang pila ka mga basiyo sang nagkalain-lain nga armas-luthang.
Bangud sa kaakig sini, ginhangkat pa ni Pancito ang mga NPA sang isa ka enkwentro sa lugar nga wala sang mga sibilyan agud wala sang may madalahig.
Samtang, ginkompirmar naman sini nga may yara man sang engkwentro nga natabo sa magtimbang nga grupo sa Januiay, Iloilo.
Suno kay Pancito posible may napatay sa hanay sang rebelde bangud may nakita sila mga dugo kag mga armas-luthang sa lugar nga ginluntaran sang engkwentro.
Nagapati naman ini nga ginasabutahe sang mga rebelde nga grupo ang ginapatigayon nga programa sang mga militar sa nasambit nga lugar.
