ROXAS CITY – Ginhimo nga inspirasyon sang isa ka estudyante ang iya sini nga pamilya agud makatapos ini sa iya nga pag-eskwela.
Sa interview sang Bombo Radyo Roxas kay Ms. Phoebe H. Genabe, naggradwar sa kurso nga Bachelor of Science in Business Administration – Major in Marketing sa Capiz State University – Main Campus, ginpahayag sini nga indi nangin madali ang iya naagyan sang ini siya ang naga-eskwela pa bangud pigado lamang sila kag gindungan sini sa iya pagtuon ang online selling.
Suno kay Genabe nga handom gid sini halin sang High School ang kurso nga BSBA kag gintinguhaan gid sini nga dunganon sa iya nga pag-eskwela ang pagbaligya sa online sang mga produkto kaangay sang mga bayo agud masuportahan sini ang iya nga pagtuon kag mabuligan man sini ang iya mga ginikanan.
Dugang pa sini nga indi nangin madali ang tanan antes ini nakatapos sa kolehiyo kag nag-abot sa punto nga nakapaminsar ini nga mag-untat sa iya pagtuon ilabi na sang pandemya bangud magluwas nga madamo sang mga ulubrahon sa eskwela kadungan pa sini ang iya pag-online selling. Apang nalampuwasan sini ang mga kabudlay bangud inspirasyon gid sini ang iya ginikanan kag mga utod.
Nagapasalamat man ini sa iya pamilya bangud ginasuportahan siya pinaagi sa pagbulig sa pagdeliver sang iya mga baligya kun masako ini sa mga shool works.
Pahayag pa ni Genabe nga daku gid nga bagay nga ginhuptan sini sa iya kaugalingon ang laygay sang iya mga ginikanan nga magpangamuyo permi kag magsalig sa Diyos.
Ginpahayag sini nga tuman ang kalipay nga iya nabatyagan sang ini ang nakatapos sa kolehiyo kag nagapasalamat ini sang dako sa Ginoong Diyos bangud wala ini ginpabay-an tubtob nga makatapos ini sa iya pag-eskwela.
Sa karon, positibo si Genabe nga makatrabaho ini sa bangko ukon sa gobyerno pinaagi sa iya pag-apply kag handom man sini nga sa pila ka adlaw makatukod sang kaugalingon sini nga shop ukon store.
Panugyan sini sa mga estudyante kag kaangay man sini nga nagabaligya para masuportahan ang pagtuon nga indi mag-isol sa ila mga handom kag padayon lang sa pag-eskwela agud makabulig indi lamang sa kaugalingon kundi ilabi na sa mga ginikanan.
Si Genabe ang tumandok sang Roxas, City kag naggradwar sa CAPSU Main sang Hunyo 14, 2024.
