ROXAS CITY – Bangud sa kahuy-anan nga naabtan matapos nga nasal-an nga siya ang babaye sa sex video nga nagalapta karon sa mga cellphone nagsulod sa pinsar ni Alyas Nene nga magpanginmatay.
Sa exclusive interview sang Bombo Radyo Roxas kay alyas Nene, ginpahayag sini nga nahuya na ini nga magsulod sa eskwelahan matapos naglapta ang nasambit nga video bangud ginatulok ini sang iban nga mga estudyante kasunod ang ila nga paghutik hutik.
Aminado ang dalagita nga magka-itsura sila sang babaye sa video apang nagapanindugan nga may kinalain sila nga duha sa diin maputi ang nasambit nga babaye.
Nakalab-ot naman ang nasambit nga sex video sa iloy nga nagatrabaho sa iban nga nasyon sa diin nagahilibion pa nga nagpamangkot ang iloy sang biktima sa anak kun ngaa ginhimo niya ini, subongman ginkaakig ini sang nobyo nga nagabutho sa Iloilo sang nakita ang amo nga sex video.
Apang matapos mapa-athagan ni alyas Nene ang duha ka tawo nga malapit sa iya kag ginapanindugan nga indi siya ang babaye sa nasambit nga sex video, gilayon man nagpati ang mga ini.
Suno pa kay Alyas Nene nga nagpalapit ini sa Bombo Radyo bangud nagapati ini nga mabuligan siya para matinluan ang iya pangalan.
