Nagpalab-ot sang suporta ang European leaders kay Ukraine President Volodymyr Zelensky matapos magresulta sa mainit nga sabtanay ang pagpakighinala sini kay US President Donald Trump sa Oval office.
Kalakip sa nagpahayag sang suporta si European Union chiefs Ursula von der Leyen kag Antonio Costa kung sa diin ginsiguro kay Zelensky nga wala ini nagaisahanon.
Sa joint statement, ginsilingan sang 2 ka lider si Zelensky nga mangin maisog kag indi magkahadlok kag ginsiguro nga ila ipadayon ang pakikipag-angut para sa kinamatarong kag matawhay.
Ginhatagan man sang pagtamod ni French President Emmanuel Macron nga ang Russia ang aggressor sa giyera sa Ukraine kag ang Ukraine ang naagrabyado.
Nagpromisa man ini sang bulig sa Ukraine kag sanction para sa Russia sa sulod sang 3 ka tuig kag ipadayon pa nila ini.
Suno kay Macron kung may yara sang nagapakigbato para sa World War III, ini amu si Russian President Vladimir Putin kung sa diin ginatumod ni French President ang akusasyon ni Trump kay Zelensky.
Nagpahayag man sang suporta si outgoing Germany chancellor Olaf Scholz para sa Ukraine, subong man ang iban pa nga word leaders nagikan sa Netherlands, Poland, Spain, United Kingdom, Canada, Denmark kag Sweden.
Sa bahin naman sang Russia, nga siya ang naglunsyar sang full scale invasion sa Ukraine, ginsiling ni Russian Security council deputy chairman Dmitry Medvedev nga sa una nga tion ginsiling ni Trump ang kamatuuran sa nawong ni Zelensky kung sa diin gintawag niya nga “cocaine clown”.
Samtang, nagpanawagan naman si Italian Prime Minister Giorgia Meloni sa US, Europe kag ila mga kaalyado nga magpatigayon sang Summit nga wala sang pagkadelayed agud talakayon ang giyera sa Ukraine.
