Gin-anunsyo ni President Ferdinand R. Marcos Jr. ang pag-suspend sang excise tax para sa LPG kag kerosene bilang kabahin sang tikang sang gobyerno agud mapahagan-hagan ang epekto sang oil crisis.
Sa idalum sini nga direktiba, ang LPG pagabuhinan sang P3.36 kada kilo ukon mga P37.00 kada tangke, samtang ang kerosene naman ang pagabuhinan sang P5.65 kada litro agud mapanubo ang gasto sa pagluto kag iban pa nga kinahanglanon.
Magluwas sa tax deduction, ginpasalig sang Presidente nga magapabilin nga stable ang presyo sang mga basic commodities kaangay sang sardinas, tinapay, instant noodles, kag gatas tubtob sa katapusan sang bulan sang Abril.
Ginkakas man ang toll fees sa mga fishports kag ginpanubo ang terminal fees sa mga pantalan para sa mga salakyan nga nagadala sang mga produkto nga agrikultura agud indi na magtaas ang presyo sang pagkaon sa mga merkado.
Ginhatagan pagtamod ni President Marcos nga ang ini nga tikang kabahin sang pagbalanse sang komplikado nga sistema sang ekonomiya agud maamligan ang mga konsumidor samtang ginasiguro nga ang local producer indi mag-antos sang kapierdihan.
Ginpasalig sang Malacañang nga padayon nga tun-an ang tanan nga mga opsyon kag indi mag-untat ang gobyerno tubtub nga makabatyag sang matuod nga kaginhawaan ang tagsa ka Pilipino sa ila adlaw-adlaw nga pagpangabuhi.
