ROXAS CITY – Nagapatigayon sang hugot nga koordinasyon ang Philippine Ports Authority sa mga natungdan nga ahensiya sa Capiz agud malikawan nga makasulod ang African Swine Fever sa probinsya.
Ginpahayag sa Bombo Radyo ni Mr. Erdie Cocoy, Terminal Manager sang Philippine Ports Authority (PPA) Terminal Management Office – Capiz nga kalakip sa ila mga tikang ang hugot nga pagpatuman sang foot bath sa mga pasahero nga nagahalin kag nagadungka sa Culasi Port.
Ginadumilian man ang mga barko nga nagadungka sa pantalan nga magpapanaog sang mga food wastes agud malikawan ang mahimo paglapta sang virus nga ginatunaan sang African Swine Fever.
Mahibaluan nga isa ang PPA sa mga ahensiya nga kabahin sang gintukod nga Capiz Provincial African Swine Fever Task Force agud maproteksiyonan ang probinsiya sa nasambitan nga balatian nga amo ang gintunaan sang kamatayon sang nilibo ka mga baboy sa probinsya sang Rizal kag Bulacan.
