Ginbuyagyag ni Vice President Sara Duterte nga indi lang sa korapsyon sa flood control projects ang pagka-involved ni anay House Speaker Ferdinand Martin Romualdez kundi sa iligal nga sugal.
Suno kay VP Sara, humalin sang nagpungko sila ni President Ferdinand Marcos Jr. bilang presidente kag bise presidente sang pungsod, madugay na nila nga nabatian ang ginapahayag pagdeliver sang kwarta nga ginsulod sa mga maleta.
Apang, suno sa iya, subong lang ini nabuyagyag bangud may isa ka testigo nga nag-atubang sa nagapadayon nga hearing sa korapsyon sa mga proyekto sang gobyerno.
Dugang pa ni VP Sara, indi tumalagsahon para kay Romualdez ang kaangay nga uso bangud na-involved man ang kongresista sa Okada case.
Pahayag pa ni Sara, wala na siya nakibot nga may kahilabtanan sa korapsyon ang kongresista.
Samtang, ginpakigbahin ni VP Sara nga nagakabalaka si anay Presidente Rodrigo Duterte sa ginaalegar korapsyon sa mga flood control projects sa pungsod.
