PANITAN, CAPIZ – Ginaalegar nabiktima sang mga nagapakuno-kuno nga manugbaligya sang Bluetooth speaker kag Solar light nga tatlo ka mga babaye ang isa ka Ginang sa Barangay Agluway, Panitan Capiz.
Suno sa panaysayon ni Nanay Inday nga amo ang nabiktima sang tatlo ka mga kawatan, nagpadulong sa ila balay ang amo nga mga suspek kag nag-offer sang Bluetooth Speaker kag Solar Light kabaylo sang mga butang kasubong sang alahas cellphone nga guba kag iban pa.
Wala sang pagpangduha-duha kag gintanyag man ni Nanay Inday ang pendant sang kulintas nga iya lamang nakita man, apang wala ini siya sang ihibalo nga may kabaylo nga kantidad ang amo nga butang kun iprenda.
Dugang pa ni Nanay Inday nga katatlo ka beses ini nga ginkiskis sa bato ang nasambit nga pendant sang mga suspek kag didto nila nahibaluan nga may balor ang amo nga alahas.
Napamalibad pa si Nanay Inday nga ibaylo ang amo nga pendant bangud wala pa nakahibalo ang iya nga bana apang nagapamilit ang amo nga mga suspek.
Naglakat si Nanay Inday agud kuntani nga kadtuan ang iya nga bana apang sa iya nga pagbalik natalupangdan nalang sini nga wala na ang iya nga wallet nga natungtong sa altar nga may sulod kulintas kag ang amo nga pendant.
Dali-dali man suno nga naglakat palayo sa lugar ang amo nga mga suspek sakay sang ila nga motor.
Ginatinguhaan pa suno nila nga lagson kag pangitaon apang wala na ini maabutan pa.
Gani panugyan ni Nanay Inday sa mga pumuluyo sa ila nga lugar ukon sa iban pa nga mga kabaranggayanan nga kun makita man ang tatlo ka mga persona mag-report lamang sa mga kapulisan ukon sa ila nga Barangay.
