ROXAS CITY-Ginbuksan na ang isa ka Closed van nga may plaka RFJ-545 gikan sa Batangas nga nagdungka sa Culasi port sakay sa RORO vessel gin-hold sang mga katapu sang Philippine Coast Guard- Roxas bangud sa ginadudahan nga karga sini.
Suno kay Lieutenant Commander Edison Diaz, station commander sang Philippine Coastguard (PCG)-Roxas nga sandig sa deklarasyon sang nasambit nga salakyan, wala ini sang unod apang sang gin tsekyar sang PCG, tuman ka damo ang karga sini.
Nadugangan pa ang pagduda sang mga otoridad matapos nga sa pag tsekyar sang K9 dogs, makapila ina ka beses nagpungko nga naga-patimaan nga may yara sang ginadudahan nga kontrabando sa nasambit nga salakyan.
Suno sa driver sang salakyan nga si Rommy Manaleg sang Villa Pani-an, Estancia, Iloilo mangin siya ang wala nakahibalo kun ano ang karga sa iya nga salakyan.
Mahibaluan nga ang nasambit nga mga sako ang may unod nga ginadudahan ammonium nitrate ukon ‘abuno’ nga makabig man nga ‘content’ sa paghimo sang pampasigabong ukon bomba.
Suno kay Lt. Diaz, pagahulaton nila ang pag-abot sang tag-iya sang van nga si Gilbert Diocson kag ang tag-iya sang mga karga sini rason nga ginpauntat ang pagtsekyar sang kabug-usan nga karga sang closed van.
Suno pa diri nga ila man paga-tsekyaron kun may yara sang permit to transport ang tag-iya closed van.
Mahibaluan nga kinahanglan nga ipakita sang tag-iya ang mga dokumento kapareho sang in-voice ukon resibo kun sa diin makit-an ang detalye sang ginbaklan sang ‘ammonium nitrate’.
Nangin kaupod sang PCG sa pagtsekyar sang nasambit nga salakyan ang mga katapu sang Roxas City PNP, Highway Patrol Group, Maritime Police, kag mga opisyales sang Barangay Culasi.
