ROXAS CITY, CAPIZ – Nagapadayon pa ang imbestigasyon sang Roxas City Fire Station kun ano ang gintunaan sang nagluntad nga sunog sa Sitio Pagutok, Barangay Dayao, Roxas City.
Sa interview sang Bombo Radyo kay Senior Fire Officer 1 Junemar D. Galve, Chief Public Information Unit sang Roxas City Fire Station, iya ginpahayag nga on-going ang pagpangusisa sang katapo sang bombero sa lugar kun ano ang ginhalinan sang sunog.
Matandaan nga apat ka puluy-an ang totally burned samtang isa naman ang partially burned nga ginapanag-iyahan nanday Alex T. Igos, Merly S. Lanciso, Nebrito Francisco, Catherine Obaldo, kag Apple Ritas.
Naglab-ot sa P30,753 ang estimated damage sang sunog sa diin wala pa malakip ang mga kagamitan sa sulod sang balay kag mga motorsiklo nga naulamid sa sunog.
Kapin apat ka mga fire truck, duha ka ambulance, isa ka rescue truck, kag tatlo auxiliary ang gilayon nga nagresponde sa lugar.
Wala naman sang na-record nga napilasan ukon kaswalidad sa amo nga sunog.
– With a report from Bombo Jessa Mae De Los Santos
