Natalana nga maghatag ang gobyerno sang fuel subsidy sa mga pampubliko nga transport operator, mangunguma, kag manugpangisda agud mapahagan-hagan ang epekto sang pagtaas sang presyo sang gatong bangud sa krisis sa Middle East.
Suno sa Department of Finance (DOF), nagapakigkoordinar ang Department of Transportation (DOTr), Land Transportation Franchising and Regulatory Board (LTFRB), kag Department of Agriculture (DA) agud masigurado nga masarangan ang pamasahe kag mabakod ang presyo sang pagkaon. Ginatun-an man ang libre nga sakay sa mga pili nga ruta sa Metro Manila pamaagi sang Electric Love Bus program.
Ginsiling ni President Ferdinand “Bongbong” Marcos Jr. nga ginabinag-binag ang temporaryo nga pagbuhin ukon suspensyon sang excise tax sa fuel. Ang amo nga mga tikang ang ginalantaw nga mangin aksyon sa nagalala nga tensyon sa Midle East kag sa padayon nga pagtaas sang presyo sang gatong sa pungsod.
