ROXAS CITY – Padayon ang paghimo sang pamaagi sang gobyerno probinsyal sa idalom sang pagdumala ni Gov. Fredenil Castro agud mangin perpekto ang sistema angut sa pagpanghatag sang bulig pinansyal sa mga pumuluyo.
Sa interview sang Bombo Radyo kay Atty. Luvim Amores, HRMO/PIO sang Provincial Government, gintuad sini nga nangin madinalag-on ang pagpanghatag sang financial assistance sa una nga duwa ka semana nga pagpungko ni Gov. Castro sa mga nagakinahanglan nga pumuluyo kun sa diin nahatag ini sa sulod sang tatlo ka adlaw.
Apang, wala pa ini sa tuyo matabo sang gobernador nga mahatag sa isa ka adlaw nga pagproseso kun kumpleto malang ang papeles, gani masiling niya nga wala pa naabot ang luyag sang gobernador.
Suno kay Amores, naka- eksperyensya sila sa gihapon sang kasablagan bangud re-enacted budget pa lamang ang ila ginagamit kag kun indi pa ma liquidate ang una nga budget nga ginpanghatag indi sila makaangkon sang dugang nga budget agud ipanagtag liwat.
Agud masulosyunan ini, ginauna bulig ang mga nagakinahanglan gid sang daku kag ginpahulag na sang gobernador ang mga ahensya angut sa finance kun sa diin nagdesignar man sang special disbursing officers (SDO).
Matapos ang 3 ka bulan man sa liwat makapangayo ang nabuligan na pinansyal agud mahatagan man ang iban pa nga nagakinahanglan.
Wala man ginakabalak-an ni Amores ang mga sindikato nga nagapakuno-kuno lamang nga nagakinahanglan bangud suno diri, trained ukon eksperto ang mga opisyal nga nagatsekyar kag proseso sang dukomento.
Luyag ipalab-ot sini nga wala sila nagauntat sa paghimo sang pamaagi agud mapadasig ang proseso kag mangin perpekto ang sistema kun sa diin sa isa ka adlaw makuha na ang financial assistance.
