Gin-anunsyo ni Executive Secretary Lucas Bersamin nga indi automatic nga i-surrender sang gobyerno sang Pilipinas si Senador Ronald “Bato” Dela Rosa sa International Criminal Court (ICC) bisan may yara gid man sang gin-isyu nga arrest warrant batuk sa iya.
Ang pahayag ginhimo sang Executive Secretary matapos ginpamangkot ang iya reaksyon sa ginbuyagyag ni Ombudsman Jesus Crispin Remulla nga nagpagwa na sang arrest warrant ang ICC batok sa Senador may kaangtanan sa war on drugs sang nagligad nga administrasyon ni Duterte kun sa diin nagserbe ini bilang hepe sang national police nga nag-execute sang nasambit nga kampanya kontra iligal nga droga.
Suno kay Executive Bersamin, posible nga nagpaguwa sang arrest warrant ang isa ka international tribunal batuk sa mamalidha, apang kinahanglan pa suno sa iya nga ipasa paagi sa International Criminal Police Organization (Interpol).
Dugang pa nga gin-athag sang opisyal sang Malacañang nga ang proseso sa pag-aresto sa Senador ang indi mangin kaangay sang natabo kay anay Presidente Rodrigo Duterte, kon valid ang arrest warrant.
Ini bangud nga nagpagwa sang bag-o nga pagsulundan ang Korte Suprema angot sa extradition nga nagamando nga ang kaso dapat anay pamatian sa isa ka korte sa Pilipinas antes dal-on sa iban nga pungsod ang isa ka indibidwal nga subject to extradition.
