ROXAS CITY – Madamo ang nag-impormar kag may yara pa nga nagpadala sang sulat sa Gobernador sang Capiz nga nagapahibalo nga may yara naman sang nagatuhaw nga mga investment scheme sa probinsya rason nga nag-request ini sa Capiz Provincial Police Office (CPPO) kag sa Capiz Field Office NBI nga pa-imbestigahan ang amo nga isyu.
Sa interview sang Bombo Radyo Roxas kay Gov. Esteban Evan Contreras, ginpahayag sini nga ginkakibot niya ang alegasyon nga siya ang nagapanag-iya sang amo nga investment scheme.
Suno pa diri, nga madamo sang mga grupo ang naga-apelar nga kun pwede maka pay-out sila antes pauntaton ang amo nga investment bangud ginapahayag sang iban nga siya ang nagapaserado.
Ginpahayag man sang gobernador nga wala pa siya nakabaton sang investigation report gani ini ang iya ginahulat agud mahibaluan kun sin-o ang yara sa likod sini.
Pamolitika ang ginalantaw nga motibo sang gobernador kag luyag lang gub-on ang iya pangalan gani ginapasimangdan siya nga nagapanag-iya sang amo nga investment.
Dugang pa ni Contreras nga ginahimo lamang niya ang intsakto kag kun ano ang dapat nga ipatuman bangud tinutuyo sini nga maprotektahan man ang mga pumuluyo kag indi na liwat mabiktima sang investment scam.
Nagpahanumdom man ini sa mga pumuluyo nga indi na liwat magpatunto ukon magpabiktima sa kasubong sini nga negosyo.
